• Sarrera
• Bilaketa arrunta
  • Lema bidezko bilaketa
  • Forma bidezko bilaketa
  • Emaitzak
  • Grafikoak
  • Iradokizunak
• Bilaketa aurreratua
  • Bilaketa aukerak
  • Emaitza aukerak

Sarrera

CorpEus Internet euskarazko corpus gisa erabiltzen duen tresna da. Horretarako, urrats hauek egiten dira:

• Erabiltzaileak aztertu nahi dituen hitza edo hitzak sartzen ditu
• Bilatzaileen APIak erabiliz, eskatutako hitzen formak dituzten euskarazko orrien zerrenda lortzen da
• Orriak jaisten dira hainbat prozesu paraleloren bidez
• Orriak iritsi ahala, eskatutako hitzen agerpenak erakusten dira
• Amaieran, eskatutako hitzen agerpen-kopuruak erakusten dira

Jarraian azalduko dira erabiltzaileak galderak egiteko dituen aukerak, baita emaitzetan zer ekintza egin daitezkeen ere.

Bilaketa arrunta

Bilaketa arruntean, hiru kutxa soilik agertzen zaizkigu. Lehenengoan, Zer jartzen duenean, lema ala forma bidezko bilaketa egin nahi dugun azaltzen diogu CorpEusi; bigarrenean, Bilatu izenburukoan, bilatu nahi diren hitza edo hitzak sartzen dira; hirugarrenean, Analisia goiburua duenean, baldin eta lema bidezko bilaketa egitea aukeratu bada, hitzaren analisi-emaitzen artetik bat aukeratu dezakegu.

Lema bidezko bilaketa

Lema bidezko bilaketan, ez dira soilik sartutako hitza edo hitzak bilatuko, baizik eta haien deklinazio eta inflexioak ere bai. Horretarako, lehenik, sartutako hitzak analizatzen dira. Bilatu nahi diren hitzak Bilatu kutxan sartu ondoren Analisia kutxara mugitzen bagara, denbora gutxira analisi-emaitzak aukeran agertuko zaizkigu bertan, eta nahi duguna aukeratu dezakegu, analisi-emaitza horren formen bilaketa egin dezan CorpEusek. Aldiz, hitzak sartu ondoren zuzenean bilaketa botoia edo RETURN tekla sakatzen badugu, analisi posibleen artean lehenengoa hautatuko da bilaketarako.

Bilatu nahi diren hitzak sartzen diren kutxan bost hitz arte idatz daitezke, eta guztientzat egingo da bilaketa lematizatua. Kasu horretan, hitz guztien analisien konbinazio posibleak erakutsiko dira analisien kutxan.

Aurreko adibidean ikusitako bilaketaren bidez, pilotari eta azkar hitzen formak dituzten orriak itzuliko dira eta bi hitzon formen agerpenak erakutsiko. Baina, kasu batzuetan, bi hitz (edo hiru, edo gehiago) jarraian daudenean soilik erakustea nahi dugu, eta, gainera, soilik azkena nahi dugu deklinatzea (edozein termino bilatzean bezala; adibidez, energia nuklear edo irabazi asmorik gabeko erakunde). Hori lortzeko, hitzak komatxo bikoitzen artean (") sartu behar dira.

Forma bidezko bilaketa

Forma bidezko bilaketan, sartutako hitz zehatzak soilik bilatuko dira, ez haien deklinazio edo inflexioak. Analisia kutxan ez da ezer erakutsiko. Hemen ere bost hitz arte sar ditzakegu, eta, jarraian egon daitezen nahi badugu, komatxo bikoitzen artean jarri beharko ditugu.

Emaitzak

CorpEusek eskatutako hitzak bilatzen ditu Interneten (bilatzaileen APIak erabiliz), eta, gero, hitzok dituzten orri guztiak jaitsi behar ditu, hitzon agerpenak erakusteko. Horrek denbora dezente har dezake (orriak oso handiak izan daitezke, edo poliki ibili, edo web guneak erorita egon...); horregatik, emaitzen atalaren goiko aldean prozesuaren aurrerabidea erakusten duen mezua agertzen da.

Orriak iritsi ahala, bakoitzean dauden eskatutako hitzen agerpenak erakustsiz joango da CorpEus, orriaren arabera taldekatuta, eta orri bakoitzean eskatutako hitzak zenbat aldiz agertzen diren erakutsita. Orriaren izenburuan edo helbidean klik eginez gero, orria irekiko zaigu nabigatzailearen leiho berri batean.

Hitz bat baino gehiago eskatu denean baina komatxo bikoitzen artean sartu gabe, eskatutako hitzen agerpenetako bakoitza lerro batean erakutsiko da. Aldiz, komatxo bikoitzen artean sartu badira, multzo osoa erakutsiko da lerro bakoitzean.

Eskatutako hitzen agerpenak kolore ezberdinetan erakusten dira, euskarazko tresna linguistikoek berari buruz diotenaren arabera:

• Berde argia: hitza zuzena da, eta analisi bakarra du.
• Berde iluna: hitza aldaera da, eta analisi bakarra du.
• Hori argia: hitza zuzena da, eta anbiguoa da.
• Hori iluna: hitza aldaera da, eta anbiguoa da.
• Gorria: hitza ezazaguna da.

Gainera, sagua hitzaren gainean jarrita, hitzak dituen analisi guztiak erakutsiko zaizkigu kutxa mugikor batean.

Grafikoak

CorpEusek emaitzak jaistea amaitzen duenean, eskatutako hitzen formen grafikoa erakusten du ezkerrean agertzen den grafiko-itxurako botoia sakatuz gero. Grafikoa irekita dagoenean, X-itxurako botoia sakatuta, grafikoa berriz ixten da. Bilatu nahi zena forma zehatza bazen, CorpEusek lemen grafikoa erakusten du.

Grafikoan agertzen den hitzen zerrendako hitzen batean klik eginez gero, testuinguruen zerrenda murriztu egingo da aukeratutako forma edo lema duten agerpenak soilik erakusteko. Zerrendaren amaieran dagoen Guztien testuinguruak batera estekan klik eginez gero, berriz ere zerrenda osoa erakutsiko da.

Iradokizunak

CorpEusek, bilaketan laguntzeko asmoz, hainbat iradokizun egiten ditu hitza analizatu edo bilatu ostean. Adibidez, eskatutako hitzak aldaeraren bat badu, hura proposatzen digu, eta nahikoa da bertan klik egitea aldaera hori bilatzeko.

Alderantzizkoa ere egiten du, hau da, sartutako hitza aldaeraren bat bada, forma estandarra proposatzen digu.

Horrez gain, hitz bat ezagutzen ez denean, erregela fonologikoen bidez (o/u, b/p eta horrelakoak) hitz estandar batera iritsi ote daitekeen begiratzen du CorpEusek, eta hala bada hori ere proposatzen du.

Bilatzeko eskatutako hitza deklinatuta bazegoen eta deklinazio horrek aldaerak baditu, horiek ere proposatzen dira.

Gainera, eskatutakoaren emaitza gutxi agertu badira, estaldura handituz berriz saiatzeko aukera emango zaigu (hau da, bilaketan iragazki-hitz gutxiago sartuta saiatuko da gehiago bilatzen).

Bilaketa aurreratua

Bilaketa aurreratuan, bilaketa arruntekoez gain, hainbat kutxa berri agertzen dira. Horietako batzuk bilaketa motarako aukera aurreratuak dira, eta beste batzuk emaitzarako aukera aurreratuak.

Bilaketa aukerak

Dokumentuak dioen aukeraren bidez, aldiz, zenbat orri jaitsi adieraz diezaiokegu CorpEusi. Lehenetsitako balioa 10 da, orri asko jaisteak prozesua asko mantsotu baitezake. Baina benetan agerpen ahalik eta gehien izatea interesatzen bazaigu, aukera honetan jaitsi nahi dugun orri-kopurua alda dezakegu.

Emaitza aukerak

Emaitza kutxak defektuz duen balioan, bilaketa arruntean azaldu dugun jokaera izango du CorpEusek. Aldiz, Kopuruak aukera markatzen badugu bertan, ez zaizkigu agerpenen testuinguruak agertuko, kopuruen grafikoak baino ez dira agertuko.

Kopuruen grafikoak erakustea aukeratu badugu, Grafikoak izeneko zerrendan aukeratuko dugu zein grafiko ikusi nahi ditugun. Bat baino gehiago aukeratu nahi badugu, Ctrl botoia sakatuta eduki behar dugu. Tarte bat aukeratu nahi badugu, lehenengoa aukeratuko dugu eta, gero, azkena Shift edo letra larrien tekla sakatuta dugula.

Ordenatu izeneko kutxan, testuinguruak zeren arabera ordenatu nahi ditugun aukeratuko dugu. Orriak iritsi ahala, ordenatuz joango da, eta agerpen bakoitza dagokion tokian txertatuko da.

Web gunea ez den beste edozein aukeratuta, testuinguruak ez zaizkigu orriaren arabera taldekatuta agertuko. Kasu horretan, testuinguruen eskuinera erakusten da agerpen bakoitza zein orritan dagoen.

Gehienez izeneko kutxan, kopuruen grafikoetan gehienez zenbat elementu erakutsiko diren aukeratuko da. Defektuz 10 elementu erakusten dira gehienez, baina badira beste aukera batzuk ere: 20, 50, 10 agerpen baino gehiagokoak, 3 agerpen baino gehiagokoak, agerpen bat baino gehiagokoak edo guztiak.

Zerrenda mugatuta agertuko bada ere, Beste guztiak jartzen duen testuan sakatuz, denak erakutsiko zaizkigu.

Azkenik, Portzentajeak izenburu duen aukeran sakatuz gero, grafikoetako tauletan portzentajeak ere agertuko zaizkigu.